Við erum búin að vera í góðu yfirlæti um helgina og ég hef varla stigið fæti inn í eldhúsið. Á föstudagskvöldinu vorum við í mat hjá mömmu og í gærkvöldi hjá tengdó. Algjört lúxuslíf á okkur.

Í kvöld var þó engin sem bauð okkur í mat og ég eldaði cajun-kjúklingapasta að beiðni Jakobs. Hann er mesti matgæðingurinn af börnunum og hefur frábæran matarsmekk. Hann myndi seint sætta sig við ristað brauð með osti eða skinku í morgunmat heldur smyr brauðið sitt með pestó eða dijon sinnepi. Hann elskar mygluosta og mesta dekur sem hann getur hugsað sér er að fara á Noodle station á Skólavörðustígnum þar sem hann pantar sér sterka núðlusúpu. Jakob er alltaf mættur í eldhúsið til mín til að smakka á sósum þegar ég er að elda og það er frábært að fylgjast með honum á meðan hann smakkar þær til.

Og það var engin annar en Jakob sem fann uppskriftina að þessu cajun kjúklingapasta og bað mig um að elda það. Ég hafði verið að skoða skinnytaste síðuna á netinu og þegar ég hætti í tölvunni fór Jakob að skoða síðuna. Hann sá þá uppskriftina sem honum fannst við verða að prófa. Ég breytti uppskriftinni lítillega og notaði það sem ég átti í skápunum.

Cajun kjúklingapasta

• 225 gr tagliatelle
• 700 gr kjúklingabringur
• 1-2 tsk cajun krydd
• 1 msk ólívuolía
• 1 rauð paprika, skorin í þunnar sneiðar
• 1 gul paprika, skorin í þunnar sneiðar
• 1 rauðlaukur
• 3 hvítlauksrif
• 2 tómatar, skornir í bita
• 1 bolli kjúklingasoð (vatn og kjúklingateningur)
• 1/3 bolli mjólk
• 1 msk hveiti
• 3 msk rjómaostur
• nýmalaður pipar
• salt

Blandið saman hveiti, rjómaosti og mjólk í matvinnsluvél eða með töfrasprota og leggið til hliðar.

Skerið grænmetið niður og leggið til hliðar. Skerið kjúklingabringurnar í strimla og kryddið með cajun-kryddi. Hitið ólívuolíu á pönnun og steikið kjúklingabringurnar. Kryddið með hvítlaukskryddi, salti og cajun-kryddi. Leggið til hliðar.

Bætið meiri ólívuolíu á pönnuna og mýkjið paprikurnar og rauðlaukinn við miðlungsháan hita, ca 3-4 mínútur. Bætið tómötunum og hvítlauknum á pönnuna og steikið áfram í 2-3 mínútur. Bætið mjólkurblöndunni, kjúklingasoðinu og kjúklingabringunum á pönnuna og látið allt sjóða saman um stund. Smakkið til með salti og pipar.

Sjóðið tagliatelle samkvæmt leiðbeiningum á pasta. Berið réttinn fram með pasta og hvítlauksbrauði.

Jakob er búinn að biðja mig um að elda þetta pylsupasta í nokkurn tíma og ég var búin að lofa honum að elda það í vikunni. Hann er svo hrifinn af pylsuréttum og ef hann fengi að ráða þá værum við með þá í hverri viku. Ég á reyndar mjög auðvelt með að láta það eftir honum því mér þykja svona réttir líka alveg æðislega góðir.

Ég verð að viðurkenna að ég hálf skammast mín fyrir að setja þessa uppskrift inn, ef uppskrift má kalla. Hún er svo ofureinföld og eiginlega bara gefin hér sem hugmynd af kvöldmat. Þá daga sem börnin eru á löngum æfingum og við erum að koma seint heim þá þykir mér mjög gott að geta gripið í svona einfaldar uppskriftir og verið með matinn á borðinu korteri síðar.

Pylsupasta með piparostasósu

• 10 pylsur (ég nota SS-pylsur)
• smjör
• 1 piparostur
• ½ líter matreiðslurjómi
• ½ grænmetisteningur
• smá cayanne pipar

Sjóðið pasta eftir leiðbeiningum á pakka.

Skerið pylsurnar í bita og steikið á pönnu upp úr smjörinu. Þegar pylsurnar eru komnar með fallega húð er matreiðslurjómanum hellt yfir og smátt skornum piparostinum og grænmetisteningnum bætt í. Látið sjóða þar til osturinn hefur bráðnað og smakkið til með cayanne pipar.

Eftir góðan endasprett í Berlín komum við heim klukkan þrjú í nótt. Við ætluðum ekki að trúa því þegar vekjaraklukkan hringdi í morgun og það var mikið þrekvirki að komast á fætur eftir allt of lítinn svefn. Dagurinn leið þó hratt og áður en ég vissi af var vinnudeginum lokið og ég farin að huga að kvöldmat.

Við Öggi vorum farin að þrá heimaeldaðan mat og ég ákvað að hafa hann einfaldan í kvöld. Það voru skiptar skoðanir um ágæti þessa rétts, við Malín voru ekkert yfir okkur hrifnar á meðan Ögga og strákunum þótti maturinn stórgóður og borðuðu á sig gat.

Kvöldinu ætlum við að eyða fyrir framan sjónvarpið í langþráðri afslöppun. Við keyptum okkur uppáhalds súkkulaðið okkar í Berlín og ætlum að gæða okkur á því. Ég get ekki hugsað mér neitt betra þessa stundina en sjónvarpssófann og súkkulaðið.

Ragù með pasta

• 500 gr pasta (ég var með lífrænt heilhveiti penne)
• 400 gr nautahakk
• 2 msk ólivuolía
• 1 laukur
• 4 dl grænmetiskraftur
• 120 gr Philadelphia vitlök & örter
• rifinn parmesan
• salt og pipar

Sjóðið pastað eftir leiðbeiningum á pakkningu. Fínhakkið lauk og steikið í olíu þar til hann hefur fengið fallegan lit. Bætið nautahakkinu á pönnuna og steikið það vel. Hellið grænmetiskraftinum yfir og látið sjóða í 30 mínútur. Hrærið reglulega í pönnunni.

Blandið Philadelphia ostinum á pönnuna og smakkið til með pipar og salti.  Blandið saman við pastað og hrærið vel saman. Berið fram með ferskrifnum parmesan osti.

Það er búið að vera prógram á hverju kvöld þessa vikuna og við erum farin að þrá afslappað heimakvöld með góðum mat og félagsskap hvors annars. Í kvöld var Öggi á námskeiði yfir matartímann og ég var farinn á fund í fimleikunum hans Gunnars áður en hann kom heim. Mér þykir alltaf leiðinlegt þegar það vantar einhvern við matarborðið á kvöldin og sem betur fer þá gerist það sárasjaldan.

Í kvöld eldaði ég enn og aftur upp úr ársblaðinu hans Jamie Oliver. Það virðist vera hægt að elda hvaða rétt sem er úr þessu blaði, það er allt alveg æðislega gott. Þar sem lítill tími gafst fyrir matargerð í kvöld þá var ég búin að ákveða að elda pastarétt. Þegar ég var að byrja á matnum sá ég hins vegar að ég átti ekki nógu mikið af sýrðum rjóma í réttinn. Ég elska sýrðan rjóma og á hann alltaf til í ískápnum en núna var hann nánast búinn. Ég notaði það litla sem ég átti og setti svo rjóma í staðinn. Rétturinn varð svo góður að ég held að ég muni halda mig við hann þannig. Öggi borðaði þegar hann kom heim og það fyrsta sem hann sagði þegar ég kom heim var hversu rosalega góður pastaréttur þetta væri.

Pasta með púrrulauk og beikoni (ath uppskriftin er fyrir 2)

• ólívuolía
• smjör
• 2 hvítlauksrif, skorin í fínar sneiðar
• 400 g púrrulaukur, skorinn í 1 cm hringi
• laufin af nokkrum timjanstöglum (ég notað þurrkað timjan)
• 4-5 beikonsneiðar, hakkað
• 1 msk gróft sinnep (ég notaði dijon sinnep og smá af chili sinnepi frá Niclas Vahé sem er í algjöru uppáhaldi)
• 4 msk sýrður rjómi (ég var með ca 2 msk af sýrðum rjóma og ca 1 dl af rjóma)
• 200 g gnocchi eða annað pasta
• rifinn parmesan

Hitið olíu og smjör á pönnu yfir miðlungsháum hita. Setjið hvítlaukinn á pönnuna og steikið í 1 mínútu, þar til hann er orðinn gylltur. Bætið púrrulauk og timjan á pönnuna og látið malla við vægan hita í 15 mínútur. Hrærið oft í pönnunni, laukurinn á að verða mjúkur og klístraður án þess að brúnast. Takið laukinn af pönnunni, setjið meiri olíu á hana og steikið beikonið þar til það verður stökkt. Bætið sinnepi, smá vatni og lauknum á pönnuna og eldið í um mínútu. Setjið sýrða rjómann (og rjómann ef þið notið hann) á pönnuna og látið suðuna koma upp. Lækkið hitann og látið sjóða við vægan hita um stund.

Sjóðið pastað samkvæmt leiðbeiningum á pakningu. Hellið vökvanum af og bætið soðnu pastanu á pönnuna . Blandið pasta og lauk vel saman. Berið fram með ferskrifnum parmesan osti og pipar.

Þessi vika hefur verið ein sú annasamasta í langan tíma en jafnframt æðislega skemmtileg. Ég fór á þriðjudaginn á frábært makkarónunámskeið hjá Salt eldhúsi. Ég var búin að heyra góðar sögur af því og fór full af tilhlökkun og spennu. Námskeiðið er haldið í fallegu bakhúsi á Laugarveginum og um leið og ég gekk inn vissi ég að kvöldið ætti eftir að vera gott. Okkur var strax boðið upp á kaffi og heimabakaðar sörur og allir fengu uppskriftarmöppu. Síðan var byrjað að baka makkarónurnar og það sem ég naut mín. Ég vildi ekki að kvöldið tæki enda og það hreinlega flaug frá mér. Þegar ég kom heim var ég svo uppnumin og langaði svo til að segja Ögga frá því hversu dásamlegt kvöldið hafði verið en ég gat það ekki. Það er svo erfitt að lýsa svona upplifun, andrúmsloftið var svo notalegt og umhverfið svo fallegt. Ég er enn að hugsa um hvað súpan og heimabakaða brauðið sem boðið var upp á í matarpásunni var gott og bíð spennt eftir að borða makkarónurnar sem eru svo fallegar að ég er alltaf að opna ískápinn bara til að kíkja á þær. Ég er að spara þær til kvöldsins því þá ætlum við Öggi að fá okkur kampavínsglas og makkarónur og ímynda okkur að við séum í París.

Ég sá að nú var að byrja nýtt námskeið fyrir jólin, Jóla-Galdrar. Þar á að búa til konfekt, baka sörur, gera chutney, paté, rauðkál og margt fleira spennandi og ég er þegar búin að skrá mig.  

Þar sem vikan var svona þéttbókuð þá hef ég ekki náð að sinna blogginu eins og ég vil. Núna er ég hins vegar búin að svara þeim spurningum  sem ég hef fengið, bæði í kommentum og á tölvupóstum, og ég vona að ekkert hafi farið framhjá mér. Enn og aftur vil ég þakka allar fallegu kveðjurnar og kommentin, mér þykir svo gaman að heyra frá ykkur og þið gerir bloggið svo skemmtilegt. Þúsund þakkir og takk fyrir mig.

Á öllum þessum handahlaupum hefur lítill tími gefist til dundurs í eldhúsinu. Þessi einfaldi pastaréttur varð til í einum hvelli og öllum þótti mjög góður. Notið þau krydd sem ykkur þykja góð og smakkið til.

Einfalt pylsupasta

• 10 pylsur
• 1 laukur
• 1-2 grænar paprikur
• 1 dós sýrður rjómi
• 3 dl matreiðslurjómi
• krydd lífsins frá Pottagöldrum
• basil
• oregano
• timjan
• cayenne pipar
• salt
• smjör

Skerið pylsur í bita og laukinn smátt. Steikið upp úr smjöri á pönnu. Bætið rjóma og sýrðum rjóma á pönnuna ásamt kryddum. Að lokum er fínhökkaðri papriku bætt út í og látið sjóða þar til hún verður mjúk. Berið fram með pasta.

Í kvöld nutum við góðs af því að eiga afgang af kvöldmatnum síðan í gær. Við byrjuðum vikuna á pasta með kjúklingi, sveppum, hvítlauk og spínati ásamt heimabökuðu brauði með pestó og hummus. Þetta var hrein dásemd sem strákarnir voru ekki síður ánægðir með en við Öggi.

Ég eldaði hins vegar allt of mikinn mat og komst síðan að því að Malín myndi borða kvöldmat á stelpukvöldi í félagsmiðstöðinni.  Við sem eftir sátum borðuðum á okkur gat en samt sá varla högg á vatni. Ég pakkaði afgangnum inn í ískáp og var ósköp fegin að geta nýtt hann í kvöld. Þá setti ég réttinn í eldfast mót, pipraði og saltaði, og stráði rifnum osti yfir áður en ég setti hann í ofninn. Rétturinn vakti ekki minni lukku í kvöld og kláraðist upp til agna, kannski til að tryggja að hann verði ekki á borðum þriðja daginn í röð

Kjúklingapasta með spínati og hvítlauk

• 2 bakkar kjúklingalæri
• ólífuolía
• 3 hvítlauksrif
• pipar og gott salt (ég nota salt frá Jamie Oliver með sítrónu og timjan)

Hrærið saman ólífuolíu, pressuðum hvítlauskrifjum, pipar og salti og penslið á kjúklinginn. Eldið kjúklinginn í 180° heitum ofni þar til hann er eldaður í gegn.

• 1 bakki sveppir
• ½ laukur
• 2 hvítlauksrif
• 1 dós sýrður rjómi
• 1-2 dl rjómi
• 1 grænmetisteningur

Sneiðið sveppi , fínhakkið lauk og hvítlauk og steikið við miðlungsháan hita upp úr smjöri.  Bætið sýrðum rjóma, rjóma og grænmetisteningi á pönnuna og látið sjóða saman við vægan hita.

Sjóðið pasta eftir leiðbeiningum á pakkningu. Þegar kjúklingurinn er tilbúinn er kjötið hreinsað af beinunum og bætt út í sósuna á pönnunni ásamt soðnu pasta og fersku spínati. Kryddið með pipari og salti og berið fram með ferskum parmesan.

Ég hef lítið stússast í eldhúsinu þessa vikuna þar sem það hefur verið ótrúlegt útstáelsi á mér á kvöldin. Á meðan ég hef setið með vinkonum mínum yfir dýrindis kræsingum hef ég lítið skipt mér af því sem fjölskyldan hefur borðað hér heima. Í gær tók ég þó aftur yfir eldhúsinu og eldaði mjög einfaldan en góðan pastarétt sem tók ekki nokkra stund að gera.

Þessi réttur uppfyllti allar mínar kröfur í gær, það tók enga stund að útbúa hann og öllum þótti hann góður. Krakkarnir fengu sér aftur á diskinn og sumir meira að segja fjórum sinnum. Þau voru öll á einu máli um að rétturinn yrði að fara á bloggið og ég tók undir með þeim. Svona uppskriftir getur verið svo gott að eiga í handraðanum, sérstaklega þegar jólastressið er handan við hornið og enginn tími til að standa við eldavélina.

Spaghetti í rjómalagaðri tómatsósu

• 2 msk ólívuolía
• 6 stórir plómutómatar
• 1 laukur
• 3 hvítlauksrif
• 1 grænmetisteningur (mér þykja þeir bestir frá Knorr)
• 2 tsk hunang
• 1 tsk balsamik edik
• svartur pipar úr kvörn
• 1½ dl rjómi
• 2-3 dl vatn sem spaghettíið var soðið í
• salt

Sjóðið spaghetti eftir leiðbeiningum á pakkningu.

Skerið tómatana í litla bita og fínhakkið lauk og hvítlauk. Hitið ólívuolíu á pönnu og steikið tómata, lauk og hvítlauk. Bætið grænmetisteningi, hunangi og balsamik ediki á pönnuna og kryddið með pipar. Látið sjóða saman þar til laukurinn er orðinn mjúkur. Lækkið hitann, bætið rjóma saman við og látið sjóða saman um stund. Þegar spaghettíið er tilbúið er 2-3 dl af spaghettivatninu bætt á pönnuna og rétt látið sjóða saman. Að lokum er spaghettíinu bætt á pönnuna og öllu blandað vel saman.

Í dag er engin venjulegur dagur því hér fögnum við stórafmæli. Það er ótrúlegt að liðin séu 10 ár síðan við Öggi keyrðum snemma morguns á fæðingadeildina í Uppsölum. Ég man að við stoppuðum á ljósum á leiðinni og mér var litið á bílana í kringum okkur og sagði við Ögga; “Hugsa sér, hér er allt þetta fólk á leið til vinnu en við erum að fara að eignast tvö börn”. Lítið vissum við hvað biði okkar og hversu óendanlega mikla gleði þessir bræður ættu eftir að færa okkur.

Við fögnuðum deginum að ósk afmælisbarnanna á Hamborgarafabrikunni. Um helgina verður afmælisboð og þeir hafa beðið um að hafa mexíkóska kjúklingasúpu og kökur í eftirrétt.

Desembermánður hefur verið sá annasamasti sem ég man eftir og mér finnst ég varla hafa gert neitt af viti í eldhúsinu. Ég eldaði þó æðislegan kjúklingarétt um daginn sem ég átti eftir að setja inn. Þessi réttur sló í gegn á heimilinu og við mælum heilshugar með honum.

Kjúklingabringur með sólþurrkuðum tómötum

• 600 g kjúklingabringur (eða úrbeinað kjúklingalæri)
• 2 dl sýrður rjómi
• 75 g marineraðir sólþurrkaðir tómatar + 1 tsk olía
• 1 tsk salt + 3/4 tsk salt
• ferskmalaður pipar
• 1 lítill púrrulaukur
• 1 msk + 1 msk olía
• 1 dl vatn

Hitið ofninn í 200°. Mixið sýrðum rjóma, sólþurrkuðum tómötum og 1 tsk af olíunni af tómötunum saman með töfrasprota. Kryddið með 1 tsk salti og nokkrum snúningum úr piparkvörninni. Fletjið bringurnar út (ef þær eru mjög þykkar getur verið gott að kljúfa þær) og setjið 1/3 af tómatamaukinu á þær. Rúllið bringunum upp og festið með tannstöngli. Kryddið með 3/4 tsk salti og smá pipar og brúnið á pönnu í 1 msk af olíu  þannig að bringurnar fái fallegan lit. Setjið kjúklinginn í eldfast mót og setjið í ofninn í ca 10 mínútur.

Á meðan kjúklingurinn er í ofninum er sósan útbúin. Hreinsið púrrulaukinn, kljúfið hann og skerið í þunnar sneiðar. Steikið púrrulaukinn í 1 msk af olíu í ca 3 mínútur. Bætið því sem eftir var af tómatmaukinu á pönnuna ásamt vatni og látið sjóða saman í ca 1 mínútu.  Takið kjúklinginn úr ofninum og hellið sósunni yfir hann. Setjið aftur í ofninn þar til kjúklingurinn er eldaður í gegn, eða ca 10 mínútur.

Berið kjúklinginn fram með pasta og ruccola eða spínati.

Við erum ósköp löt eftir þessa stuttu vinnuviku. Það er alltaf jafn erfitt að þurfa að vakna aftur og gera eitthvað af viti eftir svona góð frí. Í kvöld nennti ég ómöglega að standa í eldhúsinu en eins og svo oft áður langaði okkur samt í eitthvað gott.

Ég leitaði í smiðju Nigellu og fann þessa einföldu uppskrift sem reyndist bjargvættur okkar í kvöld. Og þvílík dásemd sem þessi réttur var. Með svona fáum hráefnum og lítilli fyrirhöfn voru væntingarnar ekki miklar og því kom skemmtilega á óvart hvað rétturinn reyndist góður. Strákarnir voru yfir sig hrifnir og eftir matinn báðu þeir mig um að elda réttinn fljótlega aftur. Það þarf ekki að vera flókið til að vera gott.

Spaghettí með ofnbökuðu beikoni í hvítlauksolíu

• 2 msk hvítlauksólívuolía
• 250 g beikon
• 250 g spaghetti
• steinselja (má sleppa)
• ferskur parmesanostur (má sleppa)

Hitið ofninn í 240°.  Fyllið stóran pott af vatni og látið suðuna koma upp.

Setjið hvítlauksólívuolíu í botn á ofnskúffu eða eldföstu móti. Skerið beikon í bita og blandið saman við olíuna, reynið að láta hana þekja allt beikonið.

Þegar vatnið byrjar að sjóða er spaghettíið sett í pottinn og beikonið sett í ofninn. Spaghettíið og beikonið þurfa svipaðan eldunartíma, ca 10 mínútur.

Þegar spaghettíið er fullsoðið er 1 bolli af spaghettívatninu lagður til hliðar og restinni hellt af. Takið beikonið úr ofninum og bætið spaghettíinu í ofnskúffuna. Blandið vel saman og bætið spaghettívatninu sem var lagt til hliðar varlega saman við. Byrjið smeð smá og bætið við eftir þörfum.

Það er gott að bera réttinn fram með ferskri steinselju og ferskrifnum parmesan og mér þykir nauðsynlegt að mylja svartan pipar yfir hann.

Mér stóð fullur vilji til að blogga í gær en þegar til kastanna kom þá neitaði tölvan allri samvinnu. Nú er hún komin í viðgerð hjá Apple og ég vonast til að fá hana sem fyrst aftur því hennar er sárlega saknað.

Það varð því hálfgerður vandræðagangur á mér í gær og ég vissi ekki hvernig ég ætti að snúa mér í tölvuleysinu. Vissulega gæti ég bloggað úr símanum eða ipadnum en ég veit ekki hvernig ég set myndirnar þá inn. Ég ákvað því að leggjast undir feld og sofa á vandamálinu. Í morgun þegar ég vaknaði var lausnin svo augljós að ég skil ekki af hverju ég sá hana ekki strax.  Til að gera langa sögu stutta þá hef ég núna komið mér fyrir í meyjarskemmunni í borðtölvunni sem Malín fékk að taka yfir um árið. Ég gæti vel vanist því að blogga héðan, umvafin bleikum veggjum með myndum eftir Lovisu Burfitt, ilmvatnsglösum og  pjattrófubókum, og það er ekkert víst að ég fari þegar ég fæ tölvuna mína aftur.

Við vorum með einfaldan og fljótgerðan pastarétt í gær sem var mjög góður. Jakob hjálpaði til en hann er sá sem sýnir eldamennskunni mestan áhuga af börnunum og skottast iðulega í kringum mig í eldhúsinu. Í gær skar hann sveppina og laukinn, hrærði í pönnunni og smakkaði sósuna til. Við vorum sammála um að það hefði vel til tekist og borðuðum af bestu lyst. Með pastanu bárum við fram nýbakað New York-Times brauð sem ég hef svo oft talað um á hér á blogginu. Í gær bragðbættum við það með parmesan- og basilikusaltinu frá Nicolas Vahé sem fór vel með pastaréttinum.

Sveppapasta (uppskrift úr Sweet Paul magazine)

• 250 g sveppir
• 1 laukur
• 2 hvítlauksrif
• 2 msk ólívuolía
• ½ bolli vatn
• 1 ½ bolli rjómi
• 1 kjúklingateningur
• gott salt og nýmalaður pipar

Sjóðið spaghetti fyrir 4-5 samkvæmt leiðbeiningum á pakkningu.

Skerið sveppina í tvennt, saxið laukinn og hvítlaukinn. Hitið 2 msk ólívuolíu á pönnu og látið sveppina og laukana steikjast við miðlungsháan hita (ég notaði stilligu 7 af 9) þar til laukurinn er orðinn mjúkur. Hellið vatni og rjóma yfir og setjið kjúklingatening út í. Látið sjóða við vægan hita í 5 mínútur. Smakkið til með salti og pipari.

Hellið vatninu af spaghettíinu (geymið ca ½ bolla af vatninu) og blandið spaghettíinu saman við sveppasósuna. Setjið smá af spaghettívatninu saman við og hrærið vel saman.

Berið fram með ferskrifnum parmesan osti og brauði.

Ég ætla að eyða kvöldinu í saumaklúbbi með vinkonum mínum en áður en ég ríf mig af stað ætla ég að gefa ykkur æðislega uppskrift að pasta carbonara. Ég hef ekki tölu á hversu margar uppskriftir af pasta carbonara ég hef prófað og í síðustu viku prófaði ég enn eina uppskriftina. Í þetta sinn held ég að ég hafi hitti á þá réttu og að leit mín að hinni fullkomnu carbonara uppskrift sé þar með lokið.

Það er ekki hægt annað en að elska þennan rétt. Hann er svo æðislega góður og það tekur enga stund að útbúa hann sem getur hentað vel í amstri dagsins. Þar sem við erum svo sannarlega ekki á kolvetnasnauðu fæði þá fengum við okkur hvítlauksbrauð með. Svo ólýsanlega gott.

Pasta Carbonara (uppskrift frá The pioneer woman)

• 350 g pasta (hvaða tegund sem er, ég var með spaghetti)
• 300 g beikon, skorið smátt
• 1/2 laukur, hakkaður
• 2 hvítlauksrif, hökkuð
• 3 egg
• 3/4 bolli fínrifinn Parmesan
• 3/4 bolli rjómi
• Salt og vel af svörtum pipar

Sjóðið pasta samkvæmt leiðbeiningum á pakkningu.

Á meðan pastað sýður er beikonið steikt þar til það byrjar að verða stökkt. Takið beikonið af pönnunni og setjið það á eldhúspappír. Hellið fitunni af pönnunni en skolið hana ekki. Setjið pönnuna aftur á helluna, lækkið hitann í miðlungslágann (ég nota stillingu 3 af 9) og steikið lauk og hvítlauk þar til mjúkt og komið með gylltan lit. Leggið til hliðar.

Hrærið saman eggjum, fínrifnum parmesan, rjóma, salti og pipar í skál og leggið til hliðar.

Þegar pastað er tilbúið er vatninu hellt af (geymið þó 1-2 dl af pastavatninu) og pastað sett aftur í pottinn. Hellið parmesaneggjablöndunni hægt út í og hrærið stöðugt í pastanu á meðan. Sósan á að hjúpa pastað. Hrærið smá af pastavatninu saman við.  Bætið beikoninu og lauknum saman við og hrærið öllu saman. Berið fram með ferskum parmesan og meira af pipar.

Hvítlauksbrauðið var einfalt; Heimilisbrauð steikt upp úr miklu smjöri og kryddað með hvítlaukssalti.

Ég sá að læknirinn í eldhúsinu leyfir dóttir sinni að sjá um kvöldmatinn einu sinni í viku. Mér þykir það stórsniðugt og ákvað að stela hugmyndinni eins og hún leggur sig. Við ákváðum að byrja með að prófa þetta í október, Malín sá um kvöldmatinn þriðjudagskvöldið í síðustu viku og Gunnar í þessari viku.

Það er áhugavert að sjá hvað krakkarnir velja að hafa í matinn og gaman að sjá hvað þau eru áhugasöm. Malín ætlaði að steikja fisk en breytti yfir í soðinn fisk á síðustu stundu. Gunnar valdi að elda pylsupasta. Ég er þeim því innan handar í eldhúsinu en þau fá að spreyta sig á matseldinni sjálf. Þetta er sérlega skemmtilegt. Þessi kvöld eru orðin að tilhlökkunarefni því ég fæ gæðastund með einu barni í einu og svo er gaman að sjá þau stolt bera kvöldmatinn á borð. Læknirinn á hrós skilið, bæði fyrir skemmtilegt blogg og góða hugmynd!

Pylsupasta með piparostasósu

• 10 pylsur (ég nota SS-pylsur)
• smjör
• 1 piparostur
• ½ líter matreiðslurjómi
• ½ grænmetisteningur
• smá cayanne pipar

Sjóðið pasta eftir leiðbeiningum á pakka.

Skerið pylsurnar í bita og steikið á pönnu upp úr smjörinu. Þegar pylsurnar eru komnar með fallega húð er matreiðslurjómanum hellt yfir og smátt skornum piparostinum og grænmetisteningnum bætt í. Látið sjóða þar til osturinn hefur bráðnað og smakkið til með cayanne pipar.

Um helgar eyði ég yfirleitt meiri tíma í kvöldverðinn. Þá vil ég bjóða upp á betri mat og nýt þess að hafa góðan tíma í eldhúsinu. Það gerist þó að tíminn hleypur frá mér og þá þykir mér gott að eiga góðar uppskriftir sem tekur stuttan tíma að matreiða.

Á laugardaginn áttum við Malín mæðgnadag og komum seint heim. Við eyddum deginum tvær saman, litum í búðir og á kaffihús, keyptum smá jólaskraut og enduðum á því að gera vikuinnkaupin. Þegar við komum heim fór ég í eldhúsið og útbjó ljúffengan pastarétt sem tók svo stuttan tíma að elda að Öggi rétt náði að leggja á borð og kveikja á kertum áður en maturinn var tilbúinn.

Það sem gerir réttinn svona fljótlegan er að ég notaði ferskt tortelini sem þarf bara að sjóða í 1 mínútu. Mér þykir ferskt tortellini sérlega gott og það er hægt að leika sér endalaust með það. Á laugardaginn bjó ég til sósu úr pestó, rjóma og ferskrifnum parmesan og blandaði saman við pastað ásamt rauðri papriku, rauðlauk og kirsuberjatómötum sem ég skar niður á meðan ég beið eftir að suðan á pastavatninu kæmi upp.  Það væri líka hægt að bæta við ólívum, salami, sólþurrkuðum tómötum, ruccola, spínati eða hverju því sem hugurinn girnist. Með góðu pasta er ekki hægt að mistakast og best af öllu, ljúffeng máltíð stóð á eldhúsborðinu á innan við korteri.

Tortellini með rjómapestósósu

• 2 pokar ferskt tortellini með þurrkaðri skinku og osti
• 1 peli rjómi (2,5 dl.)
• 1 dl grænt pestó
• 1 dl ferskrifinn parmesan
• 1 rauð paprika
• 1/2-1 rauðlaukur
• 1 pakki kirsuberjatómatar (250 g)

Sjóðið pastað eftir leiðbeiningu á pakkningu. Ég var með pasta frá RANA sem þarf bara að sjóða í 1 mínútu. Setjið rjóma og pestó í pott og hitið við vægan hita þar til blandan þykknar örlítið. Hrærið parmesan út í og leggið til hliðar.

Skerið papriku og rauðlauk í fína bita og kirsuberjatómata í tvennt. Hrærið um helmingi af pestósósunni saman við pastað og blandið svo papriku, rauðlauk og kirsuberjatómötum saman við. Myljið svartan pipar yfir og endið á að rífa vel af parmesanosti yfir diskinn. Berið fram með því sem eftir var af pestósósunni, ferskum parmesan og hvítlauksbrauði.

Mér þykir tíminn fljúga frá mér þessa dagana. Helgin leið á ógnarhraða og í gærkvöldi var okkur boðið í mat til mömmu þar sem við fengum æðislega blálöngu með ólívum, sólþurrkuðum tómötum, hvítlauk og fleira góðgæti og borið fram með sætri kartöflustöppu. Synd að myndavélin gleymdist heima því annars hefði ég myndað og sníkt uppskriftina fyrir ykkur.

Það er þó hvergi að örvænta því ég luma á æðislegri uppskrift sem ég ætlaði að deila með ykkur í gær en komst aldrei í það. Ég lét nefnilega verða af því að prófa kjúklingauppskrift sem ég hef horft hýru auga til allt árið en af óskiljanlegum ástæðum látið þar við sitja. Þegar við vorum að gæla við þá hugmynd að elda eitthvað gott á laugardagskvöldinu ákvað ég að nú væri tími til kominn að prófa uppskriftina. Það reyndist frábær ákvörðun því rétturinn var æðislegur og vakti gífurlega lukku meðal viðstaddra. Uppskriftin er ykkar ef þið viljið líka prófa. Ég mæli með því!

Kjúklingagratín með tómat- og ostasósu (uppskrift frá Matplatsen)

• 800 g kjúklingabringur

Tómatsósa:

• 1 dós hakkaðir tómatar (ég mæli með Hunt’s roasted garlic, passaði súpervel)
• 3 msk tómatpuré
• ½ rauð paprika
• ½ gul paprika
• 1 tsk ferskt rautt chili (ég tók fræin úr, krakkana vegna)
• 1 hvítlauksrif
• salt og pipar

Ostasósa:

• 1 msk smjör
• 1 msk hveiti
• 3 dl mjólk
• 50 g sterkur gouda ostur
• salt og pipar

Toppur:

• 2 fínhakkaðir skarlottulaukar
• 1-2 dl kasjúhnetur
• fersk basilika

Hitið ofninn í 200°.

Byrjið á tómatsósunni. Skerið paprikur í teninga og fínhakkið chili og hvítlauksrif. Setjið í matvinnsluvél ásamt tómötum og tómatpure og mixið saman í 10 sekúndur. Þetta er líka hægt að gera með töfrasprota.  Saltið og piprið.

Ostasósan: Bræðið smjörið í potti og hrærið hveitinu saman við. Setjið 1,5 dl af mjólk saman við og látið suðuna koma upp á meðan hrært er í pottinum. Bætið restinni af mjólkinni út í og látið suðuna koma aftur upp. Takið af hitanum og hrærið rifnum osti saman við. Saltið og piprið.

Skerið kjúklingabringurnar í bita og leggið í eldfast mót. Saltið og piprið. Hellið tómatsósunni yfir kjúklingabitana og síðan ostasósunni. Stráið hökkuðum skarlottulauk og kasjúhnetum yfir. Bakið í ofni í 20-25 mínútur, eða þar til kjúklingurinn er full eldaður. Stráið feskri basiliku yfir réttinn áður en hann er borinn fram. Berið fram með pasta, hrísgrjónum eða salati.

Það styttist í helgina og eflaust margir farnir að huga að helgarmatnum. Ég ætla því að setja inn uppskrift af einföldum en ljúffengum föstudagsmat sem tekur stutta stund að útbúa og gæti verið kjörið að enda vinnuvikuna á. Mér þykir svo notalegt að eyða föstudagskvöldunum heima og það hentar vel að borða þennan rétt í sjónvarpssófanum til að gera kvöldið enn notalegra.

Stundum þurfa hlutirnir að gerast í einum grænum og þá koma svona uppskriftir sér vel. Þessi réttur er ó, svo góður og það tekur eflaust styttri tíma að útbúa hann en að panta pizzu. Með öðrum orðum, fullkominn föstudagsmatur!

Spaghetti alla carbonara (fyrir 4) – uppskrift frá Allt om mat

• 1 laukur
• 1 hvítlauksrif
• 250 g beikon
• 50 g pecoriono ostur
• 50 g parmesan ostur
• 2 msk ólífuolía
• 2 egg
• 2 eggjarauður
• pipar úr kvörn
• 400 g spaghetti

Fínhakkið lauk og skerið hvítlauk í sneiðar. Skerið beikon í bita og fínrífið pacoriono og parmesan ostana.

Hitið olíuna á pönnu og steikið hvítlaukinn í henni þar til hann byrjar að fá gylltan lit. Takið hvítlaukinn af pönnunni. Setjið lauk og beikon á pönnuna (í olíuna sem hvítlaukurinn var í) og steikið þar til laukurinn er mjúkur og beikonið fallegt á litinn, það tekur um 3 mínútur. Hrærið egg og eggjarauður saman við ostana og kryddið með pipar.

Sjóðið spaghettí samkvæmt leiðbeiningum á pakkningu. Geymið 1 dl af pastavatninu.

Hærið saman spaghettí, lauk og beikon. Hrærið eggja- og ostablöndunni saman við og blandið vel saman. Hrærið pastavatninu saman við, smátt og smátt, þar til réttri áferð er náð. Mér þykir 1 dl. passlegt.

Berið fram með ferskrifnum parmesan, pipar og jafnvel steinselju.

 Allt hráefni í þessa uppskrift fæst í

Þvílík helgi sem við fengum! Ég og strákarnir nýttum veðurblíðuna á laugardeginum og fórum í dagsferð um suðurlandið með vinkonu minni. Við heimsóttum meðal annars sundlaugina á Hellu (frábær sundlaug), Seljalandsfoss og vinnufélaga okkar sem var staddur í Þykkvabænum. Ferðina enduðum við síðan í þriggja rétta humarveislu á Fjöruborðinu á Stokkseyri. Æðislegur dagur í alla staði.

Við vorum ekki í neinu stuði fyrir fisk í kvöld og ég skellti því í stórgóðan pastarétt sem við fáum seint leið á. Þessi hefur lengi verið í uppáhaldi og ég geri yfirleitt tvöfaldan skammt því krökkunum þykir svo gott að hita hann upp daginn eftir. Það er svo einfalt og fljótlegt að útbúa þennan rétt og í kvöld lögðum við á borð í sjónvarpsholinu og horfðum á Tyrant yfir matnum. Frábærir þættir sem eru sýndir seint á sunnudagskvöldum og því hentar okkur betur að taka þá á frelsinu daginn eftir. Ég mæli með þeim ef ykkur vantar þætti til að horfa á!

Pasta í rjómasósu með beikoni og sveppum (uppskrift fyrir 3-4)

• 250 g sveppir (1 box)
• 130 g beikon (ég nota 1 bréf af eðalbeikoni)
• 1 laukur
• 2 dl sýrður rjómi
• 2 dl rjómi
• 1/2 grænmetisteningur
• salt og pipar
• smá af cayenne pipar (má sleppa)

Skerið sveppina í fernt, hakkið laukinn og skerið beikonið í bita. Hitið smjör á pönnu (mér þykir alltaf betra að steikja úr smjörlíki) og steikið sveppina þar til þeir eru komnir með góða steikingarhúð, bætið þá lauk og beikoni á pönnuna og steikið áfram þar til beikonið er fullsteikt og laukurinn orðinn mjúkur. Hellið rjóma og sýrðum rjóma yfir og látið sjóða við vægan hita í nokkrar mínútur. Smakkið til með grænmetiskrafti, salti og pipar. Endið á að setja örlítið af cayenne pipar fyrir smá hita.

Sjóðið pasta eftir leiðbeiningum á pakkningu. Ég er hrifin af pastanu frá De Cecco og í þennan rétt nota ég spaghetti n°12 sem ég sýð al dente (10 mínútur). Mér þykir þykktin á því vera svo góð og passa vel í réttinn.

Blandið pastanu saman við pastasósuna og hrærið smá af pastavatninu saman við. Það skemmir ekki fyrir að rífa parmesan yfir áður en rétturinn er borinn fram en það má þó vel sleppa því. Dásamlega gott á báða vegu.

Allt hráefni í þessa uppskrift fæst í

Þessi vika hefur að mestu snúist um samræmdu prófin hjá strákunum og við erum því sérlega glöð yfir því að helgin sé framundan. Það er greinilega aðeins of langt síðan ég var í 7. bekk og ég stend í mikilli þakkarskuld við alnetið og þær upplýsingar sem þar má finna þegar ég stend á gati. Ætli ég sé ein um að vera svona ryðguð? Æ, hvað ég eiginlega vona það þó það væri vissulega huggun í að vita af fleirum sem klóra sér í kollinum yfir kenniföllum og rómverskum tölum. 

Þar sem það styttist í helgina ætla ég að koma með hugmynd að æðislegum helgarmat. Okkur þykir þessi réttur svo dásamlega góður að við borðuðum hann tvisvar í síðustu viku (alveg dagsatt!). Í annað skiptið buðum við mömmu í mat og hún dásamaði hann í bak og fyrir. Við höfum bæði borið réttinn fram með taglatelle og með ofnbökuðum kartöflubátum og salati. Bæði er mjög gott en mér þykir pastað þó standa upp úr. Það er bara eitthvað ómótstæðilegt við kjúklinginn með beikon/steinselju/parmesan hjúpnum og bragðmikilli soðsósunni sem pastað tekur í sig. Svoooo brjálæðislega gott og mín besta tillaga fyrir helgina.

Kjúklingur með beikoni, steinselju og parmesan í dásamlegri sinnepssósu

• 4 kjúklingabringur (um 700 g)
• pipar og salt
• um 160 g beikonstrimlar
• 2 dósir sýrður rjómi
• 1/2 sóló hvítlaukur
• 1 msk Hunt´s Yellow Mustard
• 2 msk sojasósa
• 1-2 kjúklinga- eða grænmetisteningar (mér þykir best að blanda þeim)
• smá cayenne pipar
• handfylli af hakkaðri steinselju
• handfylli af rifnum parmesan

Skerið kjúklingabringurnar í sneiðar og leggið í eldfast mót. Saltið lítillega og piprið. Setjið sýrðan rjóma, teninga, pressaðan hvítlauk, sinnep og sojasósu í pott og látið sjóða saman við vægan hita í nokkrar mínútur. Hellið sósunni yfir kjúklinginn. Steikið beikonstrimla á pönnu og stráið yfir. Stráið að lokum hakkaðri steinselju og rifnum parmesan yfir. Bakið við 175° í 40 mínútur.

Berið fram með tagliatelle, pipar og vel af ferskrifnum parmesan.

Allt hráefni í þessa uppskrift fæst í

Enn ein helgin framundan og ég ætla aftur að koma með hugmynd að föstudagsmat. Það hafa eflaust fáir gaman af því að ráfa hugmyndasnauðir um matvörubúðina eftir vinnu á föstudögum, þegar hugurinn er kominn heim í helgarfrí. Það þarf fá hráefni í þennan dásamlega kjúklingarétt sem tekur enga stund að reiða fram þegar heim er komið. Ferskur parmesan þykir mér nauðsynlegur með og ekki skemmir fyrir að hita gott hvítlauksbrauð og bera fram með réttinum. Súpergott!

Pasta með kjúklingi í pestórjómasósu

• 2 kjúklingabringur
• 1 rauð paprika
• 6 stórir sveppir
• smjör til að steikja í
• 4 dl rjómi
• 5 msk gott grænt pestó
• salt
• 1/2 kjúklinga- eða grænmetisteningur (má sleppa)
• pasta

Skerið kjúklingabringur í litla bita og steikið þá í smjör þar til þeir hafa fengið fallega steikingarhúð. Hakkið sveppi og papriku og steikið með kjúklingnum í smá stund. Hellið rjóma yfir og látið sjóða saman við vægan hita til að hann taki bragð af paprikunni og sveppunum. Hrærið pestó út í og smakkið til með salti. Þið gætuð þurft að bæta smá pestó til viðbótar í og jafnvel 1/2 teningi, smakkið til!

Sjóðið pasta eftir leiðbeiningum á pakkningu. Berið fram með ferskum parmesan og njótið.

Allt hráefni í þessa uppskrift fæst í

Það er alltaf pláss í uppskriftabókinni fyrir fljótlega rétti sem bragðast eins og veislumatur. Þessi pastaréttur er nákvæmlega þannig og hentar því frábærlega þegar von er á saumaklúbbnum eða matargestum og allt er í hershöndum.

Dásamlega góður pastaréttur sem stendur alltaf fyrir sínu. Ég ber hann einfaldlega fram með hvítlauksbrauði og ferskum parmesan sem hver og einn rífur yfir diskinn sinn. Súpergott!

Pasta með kjúklingi, sólþurrkuðum tómötum og basiliku (uppskrift fyrir 4)

• 400 g tagliatelle
• 600 g kjúklingabringur
• 1 laukur, hakkaður
• 8 sólþurrkaðir tómatar
• 1 dl vatn
• 1 kjúklingateningur
• 2 dl rjómi
• 0,5 msk þurrkuð basilika
• salt og pipar
• 2 dl parmesanostur, rifinn

Sjóðið pastað. Skerið kjúklinginn í strimla og steikið á pönnu ásamt hökkuðum lauk og tómötum. Bætið vatni, kjúklingateningi og rjóma á pönnuna og látið sjóða saman í 5 mínútur. Smakkið til með basiliku, salti og pipar.

Hellið vatninu af pastanu. Hrærið pastanu og parmesan saman við kjúklingasósuna og hrópið gjörið þið svo vel! Berið fram með ferskrifnum parmesan og hvítlauksbrauði.

Allt hráefni í þessa uppskrift fæst í

Þetta hefur verið annasöm vika og ég er svo brjálæðislega fegin að það sé loksins komið föstudagskvöld. Ég er ekki með nein plön fyrir helgina en sé fyrir mér góðan svefn, göngutúr, heitt súkkulaði (elska að fara á Súfistann eftir göngur og fá mér heitt súkkulaði með miklum rjóma) og að sjálfsögðu góðan mat. Kvöldinu í kvöld ætlum við hins vegar að eyða í sjónvarpssófanum og á meðan ég bíð eftir að The voice byrji má ég til með að gefa uppskrift af pastarétti sem við gerðum um daginn og var svo góður. Ég er veik fyrir pastaréttum og eftir að ég keypti mér æðislegan parmesan fyrr í mánuðinum hef ég nýtt hvert tækifæri til að vera með rétti sem hægt er að rífa hann yfir. Þvílík veisla segi ég bara!

Pasta með beikoni, sveppum og sólþurrkuðum tómötum (uppskrift fyrir 3)

• 250 g beikon
• 150 g sveppir
• 2 skarlottulaukar
• 1-2 hvítlauksrif
• 1 dós sýrður rjómi (180 g)
• 2,5 dl rjómi
• 4 sólþurrkaðir tómatar + 3 msk af olíunni
• salt og pipar
• 1-2 dl af vatninu sem pastað var soðið í
• 2 msk fínrifinn parmesan ostur

Sjóðið pasta í vel söltu vatni, samkvæmt leiðbeiningum á pakkningu.

Skerið beikonið í bita og steikið. Hellið fitunni af pönnunni. Hakkið laukinn, hvítlaukinn og sólþurrkuðu tómatana, skerið sveppina í fernt og bætið á pönnuna. Steikið áfram í nokkrar mínútur. Bætið sýrðum rjóma, rjóma og olíunni frá tómötunum á pönnuna og látið sjóða í nokkrar mínútur. Smakkið til með salti og pipar. Bæti smá af vatninu sem pastað var soðið í á pönnuna og sjóðið áfram í nokkrar mínútur. Takið pönnuna af hellunni og hrærið parmesan í sósuna. Berið fram með pasta og ferskrifnum parmesan.

Allt hráefni í þessa uppskrift fæst í